يوم عاشورا دي يا روز قيامت دير بوگون
يا قيامت عرصه‌سيندن بير علامت دير بوگون

عالـم باطنده ايمـدي کربلا قان آغليور
خنجر قاتل باخير مقتوله هر آن آغليور
بيـر طرفـده ليلـي‌زار و پريشان آغليور
بير طرفده زينبه گويا قيامت دير بوگون

گه گلـور تل اوسته اول نالان باشيندا اللري
گه ييغيرباش‌سيزلاري باشه تؤکور ياش گوزلري
گه گيدور گاهي دورار از بسکه تترر ديزلري
آخر اول بيچاره ده گور بيرنه حالتدور بوگون

هر طرفدن ايمدي دشمن‌لر آلوب دور و بري
قانـه غلطـان ايليوبلـر شــاهزاده اکبـري
تيغ و خنجرله اولوبدور پاره‌پاره پيکـري
ام ليلي گور نئجه صاحب سعادت دور بوگون

وورديلار از بس بوگون بيحد جراحت قاسمه
زخم خنجر حاصل ائتدي استراحت قاسمه
قوردي شـاه کربلا اسباب عشرت قاسمه
قان حنا ياخدي او عشرتدن اشارت دور بوگون

کربلا دشتي دولوب بوگون فغان و داديله
دولدوروب صحراني زينب ناله و فرياديله
سالديـلار عبـاسي آتدان قامت شمشاديله
نه باشي سالم نه قوللاري سلامت دور بوگون

بير طرفده شمر دورموش خنجر برانيله
بير طرفـده سـرور دوران لب عطشانيله
نقد جان الده دوتوب سودا ائده جانانيله
چون گورردي ياخشي بازار تجارت دور بوگون

حرملـه بيـر يانـدا الـده نـاوک پيکان دوتوب
متصل قان قان ديور چون گوزلريني قان دوتوب
اصغري ايلوب نشان اصغر الينده جان دوتوب
کربلاده گور بو ساعت بير نه ساعت دور بوگون

نه شه لب تشنه‌دن قوم ستمگـر ال چکر
نه شـرار دل نـه اشگ ديـده تر ال چکر
نه قويور گئتسون او بي‌کسدن حرملر ال چکر
نه خيال ياردن بير لحظه راحت دور بوگون

سالديلار پيغمبر اوغلون ذوالجناح اوستن يئره
قاره يئللر اسـدي عالم دگدي يکسر بيربيره
قطب دين اطرافين آلدي قوم کين چون دايره
روزگار دون بو دوروندن خجالت دور بوگون

اولدوروب اول سروري طبل بشارت چالديلار
حضـرت زهرانـون الـدن اختيـارون آلديلار
قرخه دين عورت اوشاق السيز اياق‌سيز قالديلار
شاه دين قتله يئتوب روز شهادت دور بوگون

ظلم ايله اؤلدوردولر بوگون مدينه شاهني
اهل‌بيتين سويديلار يانديرديلار خرگاهني
باغلاديـلار ظلم اليله اول شهون درگاهني

وورديلار باشين جدايه قتل و غارت دور بوگون


منبع؛ هرچه دارم از تو دارم مولا