ای جوانلار جان ویرور اوغلوم علی‌اکبردی بو
قویمیـون نعشین قوم اوسته شبه پیغمبردی بو

خوشدلم هـر چند گل جسمینده یاره قان ویرور
راه جانانـدا او کیمـدور بیـر بیلـه قربان ویرور
قویمیون امّا گوزوم گورسون گورورسوز جان ویرور
پارۀ قلبیمدی چون نور دو چشم تردی بو

تشنه لبدور لیک قانی سوکیمی اولموش سبیل
اوّلیـن قربانیــدور آل خلیلــون بــو قتیــل
احترامین ساخلاماق لازمدی بسدور بو دلیل
خَلقـاً و خُلقـاً رسول اکرمه مَظهردی بو

چوخ باخون بیر لحظه دور اُولموش آناسیندان کنار
وار یقیـن لیــلاده‌ده ایمـدی بو حال احتضار
بوندان آرتوق قویمیون قالسون او بیکس انتظار
طاقت و صبر دل لیلای غم پروردی بو

شمع رخسارین گوروب اود دوتموشام پروانه تک
بولمـورم نئیلیم گـورورسـوز عاشق مستانه تک
قُورخورام گلسون حرملـر باش‌آچوخ میدانه تک
میـوۀ نخـل امیـد عتـرت حیـدردی بو

طوی اتاقی بو جوانه اولدی گودال مصاف
شیعه‌لـر بیـر وقت ایله‌لّـر بو گوداله طواف
قاسمه گر چه دوتولموش خیمه‌ده بزم زفاف
پاره پاره جسمله اول مجلسه زیوردی بو

من دیمـم قاسم آنـاسی گلسـون اکبـر یاسینه
باخسا بسدور بیر نظر بو چاک‌چاک اعضاسینه
دسته گل لازمدی چون طویدا حنا خونچاسینه
تحفۀ لیلادی بو بیر دسته گُل اَحمَردی بو

خیمه‌لرده گر چه واقف اولمیوبلار مطلبه
بیر باخـون شور و نوایه ذکر یارب یاربه
چوخ چتیندور بو مصیبتده دایانماق زینبه
چـون توانای وجـود زینب مُضطردی بو

بند بند اولموش بو گُل‌تک پیکـری شمشیریله
نعشنون حمل اولماقی اولسون گرک تدبیریله
منـده دل یوخـدی سیزی آگاه ایدم تقریریله
گرچه آدی اَزبریمدور قلبده مُضْمردی بو

گلدی مقصودیم اله حاصل اولوب کام دلیم
قانیمـی ایکـاش بوقـانه قــاتیدی قـاتلیم
ای جوانلار عاجزم رفتاردن گلمـز بیـلیم
نوجوان داغی چتین‌دور عالم دیگردی بو

سالمیون تأخیره لازمدور اولونسون اهتمام
منتظـردی گوزلوری یول عترت خیرالانام
آل طـه قتلگاهه قـورخورام گلسـون تمام
اهل‌بیت مصطفایـه اوّلیـن مَنظـردی بو

صافیـا سنـده یانــوب آغـلا علـیِّ‌اکبره
آدی اکبــر شبـه روی حضرت پیغمبره
اشک چشمیله مبارک اسمینی یاز دفتره
ذکری اوّل ذکردور سرلوح و سردفتری بو