او گون که مقصدينه يتدي سند کينه خصال
امامي ايلدي مسموم او شوم بد افعال
او نازنين بدنه زهر کين موثر اولوب
دير مسبّب امام اولدي چوخ پريشانحال
گيدوب بالالارين اعجازيله وداع ايلدي
قيتدي محبسه پژمرده حال و غرق ملال
مقيّد ايلدي زنجيرله دوباره اوزون
بو قدرت و بو اسارتده چوخدي جاي مقال
ديسم اسيريدي باب الحوائج اولماز اسير
ديسم اسير دگولدي ندور او پوزقون حال
کيمون نه قدرتي وار باغلاسون يداللهي
نجه اسير اولي مرآت قادر متعال؟
بيله خيال ايدورم طوق عشقدور زنجير
علاقمند اولور عشق اهلينه اودور اغلال
گوروب رياسته هارون بو قصّه صدمه ويرار
قضيّه منتشر اولسا بولر اناث و رجال
دوشر قلمروينه انقلاب سرتاپا
قيام ايده لّه محبان شاه عرش جلال
اوزيندن ايسته دي بر نوع رفع تهمت ايده
تمام شيعه لري بلکه ايليه اغفال
خيال خامله ترتيب ويردي بير مجلس
خياله سالمادي ويرمز نتيجه خام خيال
همان او مجلسه اشراف شهري دعوت ايدوب
يغيشدي مجلسه يکسر اکبر و عقّال
او بي حيا ديدي موسي بن جعفري گتورون
چتين اله دوشه بيرده بو فرصت و بو مجال
گلوب چيخاتديلا زنداندان آيه اللهي
گوروبله شمس امامت ضعيف اولوب چو هلال
لباسلر چوريوب گل کيمي يوزي سارالوب
امامتين گوني تاپسون ياخيندي حال زوال
آچوبلا کنده و زنجيريني منافقلر
امامه قاتلي فاخر لباس ايدوب ارسال
امام رختيني تزويريله ايدوبله عوض
گتوردي مخزن علمي او مجلسه جهّال
خزان گلي کيمي گلدن لطيف اعضاسي
اسردي صاق صولا هر دم دگنده باد شمال
مکان ويريلدي او مظلومه صدر مجلسده
امامه ايلدي هارون بي حيا اجلال
دولانديروب اوزون اعيان شهره ايتدي خطاب
عم اوغلي دور منه بو سيّد حميده خصال
ضعيف اولوب بدني مختصر نقاهتي وار
عناصرينده حقيقتده ضعف وار في الحال
بو ئولسه شيعه لري متهم ايده له مني
دوزنمرم اگر اثبات اولا منه بو وبال
باخون صحيح و سلامتدي يتميوب صدمه
خيالوز اولسا اوزوندن ايدون دوباره سئوال
دوروب اياقه او دم بير حکيم نصراني
سئوال ايلدي اي آفتاب برج کمال
ئوزون بيور بو دين لر صحيح دور يا نه ؟
جواب ويرمدي خوفندن اول شه ابدال
الين حکيمه نشان ويردي يعني آنديردي
ويروبله زهر الف قامتيم اولوب چون دال
ديدي حکيم بو ياخشي بولور اوز احوالين
ايدور اشاره سي مسموم اولماقين ادلال
ويروبله زهر جفا سبز رنگ اولوبدي الي
بو زهريله ئوله جاقدور قالا جهاندا محال
داغيلدي مجلسين اهلي قضيه فاش اولدي
ويروب خليفيه يوز انفعال و بد احوال
هامي گيدوبدي قالوب اوچ نفر بيري هارون
بري امام زمان برده سند کفر سگال
نه ظلم اولوب آنا يا فاطمه گوزوندن ايراق
قصور ذلّت و جور و جفا تاپوب اکمال
امامه سند لعين آچدي ناسزا ديليني
او ماجراني بيان ايتمه اي دليم اول لال
بو قدر وار يوخاري قوزيوب شل اولموش الين
او ظلميله يتوب ارکان دينه اضمحلال
دوباره گتديله مظلوم امامي زندانه
شهادتي يازيلوبدور کتبده بو منوال
رجب آييندا ايگرمي بيشمجي گون الدي
يتوردي باشه غم هجري تاپدي عين وصال
ولي نه حاليله زنجيره باغلو جان ويردي
نه چکدي شامده زين العباددن خبر آل
امام ئولماقيني بولدي سويلدي هارون
ويروبدي پر باظيم اوستونده طاير اقبال
قويون جنازه سي قالسون شکاره گيتمه ليم
بو غمده شيعه گوزي اولماسون نجه سيّال ؟
قالوب جنازه سي جدّي حسين کيمي يرده
نه کفن و دفن ايدن اولدي نه بير نفر غسال
اگر چه يرده قالوب اوچ گون اوچ گيجه بدني
ولي لباس لرين سويموبلا قوم ضلال
نه نعشي گون قباقينديدي نه ياراليدي
نه جسمي قوش کيمي آچميشدي تيريله پر و بال
حسين جنازه سي عريان قالوب قوري يرده
علاوه جسميني آت ديرناقي ايدوب پامال
حسين مصيبتي يازسام سوزوم مفصّل وار
يازوم قضييّه ي باب الحوائجي اجمال
شکاردن قيدوب دين ايوين يخان هارون
امام دفنينه گوندردي دورت نفر حمّال
گتوردولر ديمورم تخته پاره يا تابوت
نه تخته پاره که بير قيسّا نردبانه مثال
گوتوردولر ولي بي منتها حقارتيله
او وضع حال ايدر فکريمي مدام اشغال
جنازه نون قباقينجا چکرديلر بير جار
ديمم نه ديللريله ما علي الغريب يقال
بلي قلج ياراسندان چتيندي دل ياراسي
آناسي فاطمه ذيحقدي آغلاسا مه و سال
گوروب او حالي سليمان پوزولدي احوالي
ديدي بو ذلتيله کيمدي بو ، ايدوبدي رحال؟
اگر غريبيدي گلموب سبب ندور غربا؟
بو شهرين اهليدي سالموبلار اوستونه نيه شال؟
گيدوب غلام لريندن بيري گتوردي خبر
امام دور بو ئولن باغ مصطفايه نهال
همين که بولدي سليمان کيمون جنازه سيدور
اياق يالين باش آچوخ ايتدي نعشين استقبال
الوب جنازه ني چ.خ عزتيله قويدي يره
ديدي که ننگ دور اسلاميانه بو اعمال
امامه غسل ويروب پربها کفن ايلدي
او نازنين بدنه عطر قيلدي استعمال
و ليک عالم معناده گلدي اوغلي رضا
ايدوب آتاسينا غسل و کفن او ماه جمال
امامه باخدي سليمان ديدي غريب آقاواي
عذارينه جريان ايتدي گوزدن اشک زلال
ديدي يانيندا دگول عترتي غريبيدي بو
مباد نسگل اولا حجه اللهه بو کلال
ديون حرملريمه گلسون آغلاسون بو شهه
جنازه اوسته دوشنسون تمام اهل و عيال
گلوب عيال سليمان امامه اووخشاديلار
بو يرده يادوه بير کربلا غريبيني سال
ايدذن تاپولمادي مظلوم امامه غسل و کفن
حرام زاده لر ايتدي او پاک قاني حلال
«حسيني» اولسا سنه برده کربلا قسمت
نقدر عمرون اولا جدوّه مجاور قال