بير دلبريم وار عارضي رخشنده آفتاب
يوخ يوخ اونون گل عارضينه بنده آفتاب
 
تطبيق ايلسم يوزوني آفتابيله
اولماز نظير اونا اولي شرمنده آفتاب
بير کهکشاندي صورتي خورشيد آفرين
گورمز اونون نظيريني تابنده آفتاب
 
کيمدور بو حسن صاحبي مرآت سرمدي
نــامـوس دهــر قائـم آل مـحـمــدي
 
اوخشار نگاريمين يوزينه آفتاب ؟ يوخ
وجه اللهه قياس اولور ماهتاب ؟ يوخ
نور اماميدن گون ايدر نورين اقتباس
واردور بو سوزده جاي سوال و جواب ؟ يوخ
گوندن هامي کرات جهان مستفيض اولار
بو استفاضيه اولي مانع سحاب ؟ يوخ
 
کيمدور بو حسن صاحبي مرآت سرمدي
نــامـوس دهــر قائـم آل مـحـمــدي
 
والشمس يعني آند اولا شمسه ديوب خدا
والشمسدن اونون يوزيدور اصل مدعا
والليل آند اولا گيجيه يعني زلفينه
محسود نافه ختن و عنبر و ختا
هيهات مشک چين و عبير تَرِ ختن
اول زلف مشکسايه جهاندا نظير اولا
 
کيمدور بو حسن صاحبي مرآت سرمدي
نــامـوس دهــر قائـم آل مـحـمــدي
 
يوز سبزه گندمي نجه يوز ؟ شرحه يوخ مجال
آيينه جمال خداوند ذوالجلال
گوزلر قرا گشاده جبين قاشلاري هلال
وار ساق يوزينده نقطه کيمي بير سياه خال
به به نه جاذبه ء اهل عشق و حال
اولماز شعاع کوکب درّي اونا مثال

کيمدور بو حسن صاحبي مرآت سرمدي
 نــامـوس دهــر قائـم آل مـحـمــدي

فوق مديحه دور نمکين ماه طلعتي
مکّي نقابدور، مدني پرده صورتي
چاتماز بو حسنه يوسف مصري وجاهتي
حيدر باخيشلي گوزلري شيرانه صولتي
آئينه دور پيمبره کليّه خلقتي
وار صورتينده احمد مرسل ملاحتي
 
کيمدور بو حسن صاحبي مرآت سرمدي
نــامـوس دهــر قائـم آل مـحـمــدي
 
جنت گوزلدي اهلي گوزل يوخ بونا کلام
غلمان گوزلدي، حور گوزل نهرلر مدام
واضحدور حسن صاحبيدور انبيا تمام
جنّتده جمع حسني قيلوب حي لا ينام
بونّان بيله ديردي پيمبر عَلَي الدَّوام
طاووس خلد عدنيدي مهدي شه انام
 
کيمدور بو حسن صاحبي مرآت سرمدي
نــامـوس دهــر قائـم آل مـحـمــدي
 
بو حسن بو جمال حسيني بو احتشام
بو شان بو جلال و بو عزّتده بير امام
باخدوقجا ذوالفقاره توکر گوز ياشي مدام
آغلا ر دير کي جديمي اولدور دولر لئام
تا آلماسام بو تيغيله اعدادن انتقام
قان آغلارام بابا ديرم هر صباح و شام
 
کيمدور بوو حسن صاحبي مرآت سرمدي
ناموس دهر قائم آل محمدي)